کوئٹہ: بلوچستان اسمبلی نے کوئٹہ اور سکھر کے درمیان براہ راست فضائی رابطے سمیت تین قراردادیں منظور کر لی ہیں۔
بلوچستان اسمبلی کے اجلاس میں منظور کی گئی قراردادوں میں کوئٹہ اور سکھر کے درمیان براہ راست پروازیں شروع کرنے کا مطالبہ کیا گیا، جبکہ بلوچستان کے صحافیوں کے مسائل کے حل اور صوبے سے تعلق رکھنے والے افسران سے متعلق معاملات پر بھی قراردادیں منظور کی گئیں۔
وزیراعلیٰ بلوچستان میر سرفراز بگٹی نے ایوان سے خطاب کرتے ہوئے کہا کہ اراکین اسمبلی نے اپنے تحفظات سے آگاہ کیا ہے، جس پر متعلقہ حکام سے بات کی گئی ہے۔ انہوں نے کہا کہ آسامیاں بلوچستان کے تمام لوگوں کی آبادی کے تناسب سے پُر کی جائیں گی۔
کوئٹہ اور سکھر کے درمیان فضائی رابطے کی بحالی سے دونوں صوبوں کے عوام کو سفری سہولت ملنے کے ساتھ تجارتی سرگرمیوں کو بھی فروغ ملنے کی توقع ہے۔