اسلام آباد: وزیراعظم محمد شہباز شریف نے کہا ہے کہ پاکستان کی معیشت نئے اعتماد کے ساتھ ترقی کی راہ پر گامزن ہے، اور اب وقت آ گیا ہے کہ قیمتی معدنی وسائل کو خام شکل میں بیرون ملک برآمد کرنے کا سلسلہ بند کیا جائے۔
پاکستان منرلز انویسٹمنٹ فورم 2026 سے خطاب کرتے ہوئے وزیراعظم نے کہا کہ معدنی وسائل سے بھرپور فائدہ اٹھانے کے لیے صرف خام مال کی برآمد کافی نہیں، بلکہ ریفائننگ اور مینوفیکچرنگ سمیت پوری ویلیو چین کو ملک میں فروغ دینا ہوگا۔
فورم کے دوران پاکستانی اور بین الاقوامی کمپنیوں کے درمیان 13 معاہدوں اور مفاہمتی یادداشتوں پر دستخط کیے گئے، جبکہ پاکستان مقامی پراسیسنگ اور ریفائننگ کے ذریعے معدنیات کی ویلیو چین میں اپنا حصہ بڑھانے کی کوشش کر رہا ہے۔
وزیراعظم نے ریکوڈک منصوبے کو پاکستان میں معدنی سرمایہ کاری کے لیے مثالی معیار قرار دیتے ہوئے کہا کہ جدید ٹیکنالوجی اور شفاف سرمایہ کاری کے ذریعے معدنیات کا شعبہ ملکی معیشت کی مضبوطی میں اہم کردار ادا کرے گا۔