کوئٹہ: وزیراعلیٰ بلوچستان میر سرفراز بگٹی نے کہا ہے کہ سرمایہ کاروں کو سازگار ماحول، مکمل تحفظ اور غیر ضروری دفتری رکاوٹوں سے پاک نظام فراہم کریں گے۔
بلوچستان انویسٹمنٹ اینڈ ٹریڈ ایکسپو 2026 کی افتتاحی تقریب سے خطاب کرتے ہوئے وزیراعلیٰ نے کہا کہ بلوچستان میں سرمایہ کاری کے فروغ، صنعتی ترقی اور نوجوانوں کے لیے روزگار کے نئے مواقع پیدا کرنے کے لیے حکومت، نجی شعبے اور تعلیمی اداروں کے درمیان مؤثر اشتراک ناگزیر ہے۔
انہوں نے کہا کہ حکومت بلوچستان وفاقی حکومت کے اشتراک سے اہم شاہراہوں، تجارتی راہداریوں اور سیکیورٹی کے نظام کو بہتر بنانے کے لیے اقدامات کر رہی ہے، جبکہ سیکیورٹی کے شعبے میں خطیر وسائل مختص کیے جا رہے ہیں اور پولیس سمیت قانون نافذ کرنے والے اداروں کی استعداد کار بڑھانے پر بھی کام جاری ہے۔
وزیراعلیٰ نے کہا کہ بلوچستان کے نوجوان صوبے کا قیمتی اثاثہ اور مستقبل ہیں، حکومت کا مقصد ریاست اور نوجوانوں کے درمیان موجود خلیج کو کم کرنا، انہیں بااختیار بنانا اور ان کی صلاحیتوں کو معاشی ترقی کے عمل سے جوڑنا ہے۔