راولپنڈی: آل پاکستان پیٹرول پمپ اونرز ایسوسی ایشن نے پیٹرولیم مصنوعات کی قیمتوں میں روزانہ ردوبدل کا نظام مسترد کرتے ہوئے وزیراعظم میاں محمد شہباز شریف کو خط ارسال کر دیا ہے۔
خط میں مطالبہ کیا گیا ہے کہ پیٹرولیم مصنوعات کی قیمتوں کا تعین روزانہ کے بجائے ماہانہ بنیادوں پر کیا جائے اور قیمتوں پر نظرثانی کا ماہانہ نظام بحال کیا جائے۔
ایسوسی ایشن کا کہنا ہے کہ قیمتوں میں مسلسل تبدیلی سے پیٹرول پمپ مالکان کو مالی نقصان ہو رہا ہے، کیونکہ ہر تبدیلی کے ساتھ ذخیرہ شدہ تیل کی قیمت اور منافع کا حساب متاثر ہوتا ہے۔
پیٹرول پمپ مالکان نے امید ظاہر کی ہے کہ حکومت ان کے تحفظات پر غور کرے گی اور ایسا نظام وضع کرے گی جو صارفین اور کاروباری طبقے دونوں کے مفاد میں ہو۔