اسلام آباد: قومی ایئرلائن پاکستان انٹرنیشنل ایئرلائنز (پی آئی اے) نے لندن کے لیے ہفتہ وار پروازوں کی تعداد بڑھا کر 7 کر دی ہے، جو برطانیہ کے ساتھ فضائی رابطے کی مکمل بحالی کی جانب ایک اہم قدم ہے۔
شیڈول کے مطابق اسلام آباد سے 5 جبکہ لاہور سے 2 پروازیں ہفتہ وار بنیادوں پر لندن کے لیے روانہ ہوں گی۔ حکام کے مطابق برطانیہ کی جانب سے عائد طویل پابندی کے خاتمے کے بعد پی آئی اے کی پروازوں میں بتدریج اضافہ کیا جا رہا ہے تاکہ برطانیہ میں مقیم پاکستانی کمیونٹی کو بہتر سفری سہولت میسر آ سکے۔
قومی ایئرلائن حکام کا کہنا ہے کہ لندن کے روٹ پر پروازوں کی بحالی پی آئی اے کے لیے ایک اہم سنگ میل ہے، جس سے نہ صرف ادارے کی آمدنی میں اضافہ متوقع ہے بلکہ پاکستان اور برطانیہ کے درمیان تجارتی اور سیاحتی روابط کو بھی تقویت ملے گی۔
ذرائع کے مطابق پی آئی اے انتظامیہ مستقبل میں دیگر یورپی شہروں کے لیے بھی پروازوں کی بحالی پر غور کر رہی ہے، جبکہ فی الحال لندن روٹ کو ترجیحی بنیادوں پر مستحکم کرنے پر توجہ مرکوز کی جا رہی ہے۔
