اسلام آباد: وزیراعظم محمد شہباز شریف نے کہا ہے کہ پاکستان اور چین کی دوستی محض سفارتی تعلقات تک محدود نہیں بلکہ باہمی اعتماد، احترام اور عوام کے درمیان گہرے روابط پر مبنی مضبوط اور مربوط شراکت داری ہے۔
وزیراعظم شہباز شریف سے اسلام آباد میں چینی کمیونسٹ پارٹی کے بین الاقوامی شعبے (آئی ڈی سی پی سی) کے نائب سربراہ لیو ہائی سنگ نے ملاقات کی، جس میں دونوں رہنماؤں نے پاکستان اور چین کے مابین دوطرفہ تعلقات، تجارتی و اقتصادی شراکت داری اور علاقائی و بین الاقوامی امور پر تبادلہ خیال کیا۔
وزیراعظم نے کہا کہ دونوں ممالک کے تعلقات وقت گزرنے کے ساتھ ساتھ مزید مستحکم ہوئے ہیں اور یہ رشتہ ہر آزمائش پر پورا اترا ہے۔ انہوں نے چین کی جانب سے پاکستان کی ترقی اور استحکام میں دیے گئے تعاون کو سراہتے ہوئے دونوں ممالک کے درمیان تجارتی، سرمایہ کاری اور ٹیکنالوجی کے شعبوں میں تعاون مزید بڑھانے پر زور دیا۔
ملاقات میں دونوں ممالک کے مابین پارٹی سطح کے روابط، تربیتی پروگراموں اور ترقیاتی شراکت داری کو مزید وسعت دینے پر بھی اتفاق کیا گیا۔ ذرائع کے مطابق چینی وفد نے پاکستان میں جاری ترقیاتی منصوبوں اور سی پیک کے دوسرے مرحلے میں تعاون جاری رکھنے کی یقین دہانی کرائی۔
